In de achtervolging.
Een poosie leden. een tillefoontie oet Roon. Van fiets- en scheuvelkenner Jan Sleenman. Of wij met willen naor de Ronde van Drenthe.
Zien Jantien geeit ok met. Een bus vol mèensken oet Noordenveld mag der hèen. Allemaol A.B.M.- ers. Allernaorst “Belangrieke” Mèensken.
Noou veuil dat gelukkig wel wat met. Wij hebben met mekaor een geweldige dag had.
Om elf uur bennen wij bij de Tamboer in Hoogeveen. De daomesploougen stellen zich veur. Ze zetten heur haand, as bewies van deeilnaome.
Ik verbaos mij. Wichteries nog. Gien grammegie vet op de botten. Sommige mooi opmaokt. Ze muggen naor boeten. Het startschot klinkt. Een bonte stoet vertrekt.
Een rit van 138km veur de wielen. Da’s gien kattepis. Wij zullen de haardfietseries dizze dag niet weer zeein.
De mannen vertrekken. Ze bennen gooud veurbereid. Mooi (en duur he’k heurd) materiaol. De gespierde beeinen glimmen in de zun.
Heur tocht deur’t mooie Drente is 197km lang. Hoouveul zullen ze van dat mooie zeein?
De volgbussen, begeleid deur motormannen, vertrekken. De huile dag is het motto: WEG = PECH! De chauffeurs wachten neeit.
In oonze bus ontdek ik Echbert ten Dammen met zien Minet. Egbert fokt zeldzoame knienegies. Wij hebben in Nörg bij mekaor in de klas zeten.
Herinngeringen aan die tied worden ophaold. Egbert woont al jaoren in Roon.
In de bus worden wij verzörgd deur tweei vroougies van de organisaotie.
‘s Mörgens kriegen wij een tassie, dat in de loop van de dag aal voller wordt. Eein van de vroougies rop bij ‘t oetstappen: “He, Harm Soegies!”
Ik herken heur neeit en vraog om een hint. “Een buurwichie van vroouger!” Ik schaom mij dood. ‘t Is Sienie Liebe. In heur kinderjaoren woonde zij dicht bij oons in Peeist.
Heur breurtie Gerard was in die tied oons kammerraodtie. Hij is laoter vertrokken naor Frankriek. Ik heur van Siene, dat e noou weer in Nederlaand woont.
Wij zeein de renners tweei keer deurkommen boven op de V.A.M.-barg. Dreei hebben een minuut of wat veursprong.
Een mooi gezicht, hoou ze der aan kommen en hoou ze slingernd weeer in t’landschap verdwienen. Dan naor Valthe. Wij ontdekken vanoet oonze bus, hoouu onverantwoord een moterrieder, die ons begeleidt, bezig is. De motermoezen bennen oonze baonvegers. Bennen wij ze veurbij, dan moeten ze oons weer inhaolen.
Die eeine dèenkt, dat e op de T.T.-baon is. Eein maol gung ‘t net gooud!
In Valthe gaon de renners een vlintenweg op. De dreei op kop hebben heur veursprong oetbreid. Zullen ze ‘t redden? Of worden ze vlak veur de meet, zoals zo vaok, inhaold?
Bij de rotonde in Börger. een massa volk op de beein. Der is muziek. Een vrouw wordt niet gooud. Eeine oet oonze bus. Ze geeit op ‘t gras liggen. Hartklachten!
Der wordt bèeld. een zeeikenauto is der al gauw. Steeit op de wèeg. De dreei met veursprong bennen der al langs. Het peleton op drift komp der breeid over de straot aan.
De moterrieders rieden deur. Hoou lop dit aof? Dan zeei ik wat, waor ‘k de traonen van in de ogen krieg.
Het publiek geeit de straot op, vörmt een foek en schreeuwt naor de renners, dat ze naor eein kaant moeten. Het lukt!
Maor ...., wa ‘k je noou toch nog zeggen wil, nao bij Wzup, waor een breeide asfaaltwéeg overgung in een vlintenstrook, zeein te hebben, hoou de volgauto’s zich schandaolig gedreuigen, net idioten, kwam in Hoogeveen de finish. Tweei van de dreei koplopers beleven veur. Gelukkig!
Het èende van een mooie dag. Een spannende Ronde van Drenthe deur een deeil van mooi Drenthe, de heuile dag eten en drinken, met een bus vol A.G.M.-ers (Allernaost “Gewone” Mèensken) onder leiding van Jan Sleenman, de Nörger Roner.